LA UNION – Nakabaluden ita ti maysa a lalaki a maippagaup a kameng iti bukas-kotse gang kalpasan a matiliw daytoy babaen kadagiti sibilyan gapu ti gandat a panagtakaw ken panagikot iti droga idiay syudad ti San Fernando, La Union itattay biga..
Nabigbig ti suspek a ni Willie Cutayan, residente ti nasao a syudad.
Iti pannakiuman ti Bombo Radyo kenni Dante Reyes ti Barangay San Vicente, San Fernando City, kinunana nga immuna a siritarna ti suspek a mangluklukat iti maysa a kotse idiay parking area.
Maipagarup a nakaraman pay iti danog ni Reyes manipud kenni Cutayan kasaruno iti gandat a panaglibas daytoy.
Immarayat met iti dua pay a gayyem ni Reyes a nangkamat ken nangtiliw iti suspek kasaruno iti panangiguyodda kenkuana a maiturong idiay sango ti San Fernando City Hall tapno ipaima kadagiti pulis.
Idi a makapkapan ni Cutayan ket nadiskobre iti maysa a sachet ti maatap a shabu manipud iti bulsa.
Kabayatanna, agyamyaman met iti San Fernando City Police iti grupo ni Reyes gapu iti pannakakemmeg ti suspek nga agik-ikot iti droga ken maipagarup a kameng ti bukas-kotse gang idiay syudad. (Abs Flores)
