LA UNION – Personal a nagkamang ken nangipeksa iti arungaingna ti estasyon iti Bombo Radyo La Union ti maysa a lalaki a complainant gapu ta ti abogado iti nagparang ti hearing iti barangay imbes a ti Amerikano a respondent idiay Barangay Casilagan, ili ti Naguilian, La Union.
Iti interview ti Bombo Radyo kenni Marlo Estioco, kinunana nga iti umana a hearing ti barangay babaen kenni Kapitan Ruel Bautista ket saan a nagparang ti inreklamona a ganganaet ngem ketdi nangipatulod laengen daytoy iti abogado.
Sigun kenni Estioco, tarigagayna met a makirinnisot iti susik iti baetanda ti Amerikano no la ket di agparang daytoy ti hearing iti barangay gapu ta ammona a saan a masapul a makibiang ditoy ti abogado.
Iti met pannakiuman kenni Kapitan Baustista, mabuteng ti Amerikano a sumango iti hearing isu a nangibaon laengen ti abogado a nagbalin a pannakabagi daytoy.
Aminado met ti kapitan a saan koma a mabalin nga agparang iti abogado ti hearing iti barangay, ngem ikagumaanna a mapasango iti sumaruno a hearing ti respondent.
Kabayatanna, binalakadan met ni Katarungan Pambarangay (KP) Trainor ken San Fernando City Lupon Tagapamayapa Federation President Oscar Halabaso ti kapitan a saan a masapul nga ayaban ti abogado iti hearing ti barangay gapu ta saan nga ipalubos daytoy iti KP Law.
Kasapulan kinunana a ti respondent iti sumango tapno personal a sungbatan ti reklamo kontra kenkuana. (Abs Flores)
