LA UNION – Madama ita nga agpapaimbag idiay Ilocos Training and Regional Medical Center ti maysa a 41-anyos a lalaki a gapu iti maipagarup a panangalana iti manok manipud ti maysa a compound idiay Barangay Alzate, ili ti Bangar, La Union.
Nabigbig ti biktima a ni Ronnie Bacgad, residente ti nasao a lugar.
Iti pannakiuman ti Bombo Radyo kenni SPO1 Recicar Mangibat, imbestigador iti Bangar Police Station, kinunana a maipagarup a gapu laeng iti panangalana iti manok ket isu metten iti nanggappuanan a nangtabbatan kenkuana iti suspek a ni Ponciano Coloma, 60, residente met laeng ti nasao a barangay.
Maipagarup a nagpakada ti bitkima idi nga alaenna ti nasao a manok.
Ngem impaganetget ti suspek a saan a nangted daytoy iti pammalubos tapno alaen ti nasao nga ayop.
Nasugatan iti pungu-punguan ti biktima gapu iti pannagbat ti suspek.
Kabayatanna, naiyendurso metten ti nasao a kaso iti Barangay Justice System.
