Impasigurado ni House Committee on Public Accounts Chairman ken Bicol Saro Partylist Representative Terry Ridon a saan a santoen ti Kamara de Representantes ti dagiti legislators-contractors nga adda pakainaigan da kadagiti maanomalya a flood control projects nga uray pay dagitoy ket kakadwa da mismo.
Kinuna ni Ridon a nakatuding a mangisayangkat ti moto propio investigation ti House Tri Committee mainaig iti kontrobersiyal a flood control projects ken nairanta daitoy tapno maamoan nu sinu-sino dagiti legislator-contractors ti karaman kadagiti substandard ken ghost projects iti gobierno.
Immunan nga inwaragawag ni Presidente Ferdinand Marcos Junior nga awan iti mapaboran nga opisyal ti gobierno a karaman kadagiti maanomalya a proyekto nga uray pay dagitoy ket kaalyado na.
Impaganetget met ni Ridon a saan a rumbeng a sumali ti kontrata ti gobierno, infrastructure projects man wenno saan, iti maysa a miembo ti Kongreso agsipud ta nalawag nga inlasin daitoy ti linteg, partikular iti Anti-Graft and Corrupt Practices Act.
Inlawlawag pay ni Ridon nga apaman mapaneknekan a simrek ti kontrata ti maysa a mamanday-linteg ket sigurado a dakkel iti sangwen na a problema.
Kinarit met ni Ridon a Baguio City Mayor Benjamin Magalong ken Senador Ping Lacson a naganan dagiti kongresista a kinunana da a contractors ken karaman kadagiti palpak ken ghost flood control projects.
Inlawlawag na nga awan iti listaan da kadagiti legislator-contractors isu a namnamaen na a maibutaktak ti pakabigbigan dagitoy inton madanon iti panagdengngeg.
Kinuna ti kongresista a ti nakatuding a Tri-Com hearing ket napintas a venue tapno malawlawagan iti isyu nangruna ket sumagmamano a mamanday-linteg ti maak-akusaran ken mapapati a nagnumar iti binilyon a pisos a gatad dagiti proyekto ti gobierno.
Iti Tri-Committee ket buklen ti Committee on Public Accounts, Public Works ken Good Government Committee.
