Dimmanonen iti epidemic level iti leptospirosis idiay siudad ti Manila kalpasan a limmabes iti epidemiologic threshold dagiti nairekord a kaso.
Segun kenni Manila OIC-City Health Officer Dr. Grace Padilla, ngimmato iti attack rate ti leptospirosis ti 3.48 a porsiento manipud iti 1.27 percent idi napan a lawas, a mangipasimudaag iti napartak a panagado dagiti kaso iti ababa a panawen.
Maibasar iti kaudian a datos idi Setiembre 7, dimmanon iti 982 iti pakabuklan a bilang dagiti kaso ti leptospirosis idiay Manila sipud idi Enero 1, kalpasan a nairekord ti 12 a baro a kaso.
Addan iti full capacity dagiti sumagmamano a district hospitals, pakairamanan ti Ospital ng Maynila, Sta. Ana Hospital ken Justice Jose Abad Santos General Hospital, gapu iti panagadu dagiti pasyente.
Imbilin ni Manila Mayor Francisco “Isko Moreno” Domagoso kadagiti maseknan nga opisina a paingeten iti kampania kontra iti leptospirosis, pakairamanan ti pannakaiwaras ti libre a doxycycline kadagiti 44 a health centers ken pito a district hospitals ti siudad.###
