Nangipaay iti Local Government Unit ti Bacnotan, La Union dagiti kasapulan a materyales para iti Brigada Eskwela kadagiti pampubliko a pagadalan iti ili ti Bacnotan, La Union kas paset ti panagsagana para iti panaglukat ti klase para iti School Year 2026.
Naisayangkat iti panangipaay kadagiti materyales idi kalman, Hunio 3 iti Bacnotan Farmers’ Park and Civic Center tapno suportaran iti panagsagana ken panangpasayaat kadagiti pasilidad dagiti pagadalan sakbay ti Balik-Eskwela.
Malaksid iti panangipaay kadagiti materyales, aktibo met a makipaspaset dagiti empleyado ti LGU Bacnotan iti Brigada Eskwela. Manipud pay idi Hunio 1, nagrikosen iti naduma-duma a pagadalan tapno mangipaay ti tulong ken agbalin a volunteers.
Iti panagbisita ni Mayor Divine Fontanilla, kaduana dagiti opisiales ti Municipal Engineering Office ken Municipal Health Office, nailista ken nairehistro dagiti estruktura a masapul a maurnos wenno maremedyohan. Sinukimatda met dagiti palikuran ken wash area tapno masiguro a naimbag ken natalged daytoy a mausar dagiti estudiante inton panaglukat ti klase.
Segun iti lokal a gobierno, agtultuloy iti panagboluntaryo dagiti empleyado ti LGU Bacnotan agingga iti pannakaleppas ti Brigada Eskwela iti Hunio 5.
Agtultuloy met ti LGU Bacnotan, babaen ti panangidadaulo da Mayor Divine Fontanilla ken Vice Mayor Francis Fontanilla, iti panangitag-ay kadagiti programa a mangpasayaat kadagiti pasilidad dagiti pagadalan tapno maipaay iti natalged ken nasayaat a lugar ti panagadal para kadagiti amin a Bacnotanean. (Report by Bombo Jordan)
