LA UNION – Maipaayan ti libre a pannakaitabon iti pampubliko a sementeryo idiay Barangay Santiago, Bauang, La Union dagiti tallo nga agkakabsat nga ubbing a natay iti pannakalmes iti karayan idiay Barangay Pugo ti nasao nga ili idi malem ti Domingo.
Daytoy ti impanamnama ni Bauang Mayor Menchie De Guzman kagiddan ti panagturong na idi kalman iti pagtaengan ti pamilya Mazon a nakaimasayagan iti bangkay dagiti ubbing.
Malaksid dayta, mangipaay pay ti munisipiyo iti ayuda para iti naulila a pamilya.
Kumiddaw pay ti LGU iti tulong manipud iti nasyunal a gobyerno a maipaay met laeng iti maseknan a pamilya.
Nakatuding a maitabon iti bangkay dagiti ubbing inton Huwebes.
Kagiddan daytoy, immapela ti mayor kadagiti tattao a mapan makilam-lamay ken makitabon a suruten dagiti maipatpatungpal nga allagaden ita a panawen ti pandemya, tapno maliklikan ti local transmission iti covid 19.
Bauang Mayor Menchie De Guzman
