BALAOAN, LA UNION – Naiyuswat ti libre a point-to-point shuttle service para kadagiti taga-Balaoan kas paset ti agtultuloy a panagregget tapno nalaklaka ken nataltalged ti inaldaw a panagbiaheda.
Segun iti anunsio, agserbi ti free ride iti dua a kangrunaan a ruta: Balaoan agingga iti San Fernando City ken Balaoan agingga iti Bacnotan, ken ti kasumbangirna.
Panggep daytoy a mangipaay iti nasaysayaat ken makabael a transportasion kadagiti umili, nangruna dagiti trabahador, estudiante, ken dadduma pay a regular commuters.
Opisial a mangrugi ti operasion ti shuttle service ita nga aldaw Abril 8, 2026 ken agtalinaed agingga iti kanayonan a pakaammo manipud iti lokal a gobierno.
Eksklusibo laeng daytoy para kadagiti lehitimo nga agnanaed ti Balaoan ken masapul nga ipakita ti valid ID nga addaan ti address.
Adu dagiti biahe a naikeddeng iti tunggal aldaw tapno masigurado nga ad-adu a pasahero ti maserbian.
Maallukoy ti publiko a suruten iti naikeddeng nga schedule ken agtungpal kadagiti pagannurotan iti panagsakay tapno mataginayon ti urnos ken kinatalged para iti amin.
Babaen ti programa, namnamaen dagiti opisyal a mapalag-an iti gastos ti plete dagiti umili ken maksayan ti rigat ti panagbiahe, nangruna iti baet ti agtultuloy a panagngato ti presio ti langis. (Report by Bombo Ericka)
