Maysan a linteg iti singasing a mangipaay ti libre a pumpon para kadagiti marigrigat a Pilipino.
Daytoy ket kalpasan a ma-enacted uray saan pay a pinermaan ni Presidente Ferdinand Marcos Junior.
Iti baro a linteg nga Republic Act No. 12309 wenno “Free Funeral Services Act” ket awtomatiko a nagbalin nga linteg idi Setyembre 28, kalpasan ti 30 nga aldaw manipud idi impasa daytoy ti Kongreso iti Malacañang, kas maitunos iti Article VI, Section 27(1) ti 1987 Constitution.
Babaen ti nasao a linteg, idauluan ti Department of Social Welfare and Development (DSWD) iti panangipaay ti libre a serbisio iti pumpon kadagiti pamilya nga addaan ti pagdaldalanan a krisis, pakairamanan dagiti indigent wenno dagiti naduprak ti kalamidad.
Sakupen met ti libre a funeral package iti embalsamo, panakaimasayag, cremation wenno pumpon, transpiration, ken lungon wenno urn.
Kasapulan ti pamilya iti death certificate, valid ID, kontrata iti funeral home, ken social case study manipud iti DSWD worker sakbay a maka-avail.
Dagiti funeral establishments a paset iti programa ket bayadan dagiti DSWD regional offices maibasar iti aprobado a kontrata. Iti inisial a pondo ket maala manipud ti P44.75 billion budget ti Assistance to Individuals in Crisis Situations (AICS).
Para kadagiti funeral homes nga aglabsing iti daytoy a linteg ket mapatawan ti multa a P400,000 ken panangkansela iti lisensya, bayat nga dagiti matiliwan nga agkus-kusit man wenno mangipasa ti peke a dokumento tapno laeng makaala ti serbisio ken mabalud ti innem a bulan ken agmulta ti aginggana P500,000.
Maipalagip nga iti RA 12309 ket immuna nga impasa ti Senado kas Senate Bill No. 2965 idi Hunyo 2, ken in-adopt ti Kamara kas House Bill No. 102 idi Hunyo 11. Naipatulod daytoy iti Office of the President idi Agosto 28, ngem saan a pinermaan ni Marcos aginggana nagbalinen a linteg iti panaglabas ti panawen idi Setyembre 28.###
