Agtultuloy iti panangpapigsa ti Department of Health (DOH) iti serbisio pangsalun-at ti publiko babaen ti DOH Wellness Clinic a masarakan idiay Robinsons La Union.
Mangipaay ti wellness clinic kadagiti umili ti La Union ken dadduma pay a lugar iti de kalidad, accessible, ken libre a serbisio-medikal para iti nadumaduma a pagkasapulan pansalun-at.
Masarakan ti DOH Wellness Clinic iti Level 4, iti abay ti EatStreet ti Robinsons La Union, ken inaldaw a silulukat manipud Lunes agingga’t Domingo, manipud alas-onse ti bigat agingga alas-sais ti sardam.
Karaman kadagiti regular a serbisio a mabalin a ma-access ti publiko ket dagiti medical consultation ken vital signs monitoring, a makatulong iti nasapa a pannakaduktal ken pannakamonitor dagiti nadumaduma a kasasaad ti salun-at.
Mangitukon ti klinika kadagiti espesial a serbisio kadagiti espesipiko nga aldaw iti kada bulan.
Para iti Adult Medicine, maangay dagiti konsultasion iti tunggal umuna a Martes ti bulan, manipud ala-una agingga iti alas-tres ti malem.
Dagiti serbisio ti Obstetrics and Gynecology (OB-GYN), malaksid kadagiti prenatal check-up, ket magun-odan iti tunggal maikadua a Martes ti bulan, manipud ala-una agingga alas-kwatro ti malem.
Para kadagiti ubbing, magun-odda dagiti serbisio ti Pediatrics iti tunggal maikatlo a Martes ti bulan, manipud ala-una agingga alas-kwatro ti malem.
Maangay ti Ophthalmology and Vision Screening iti tunggal maikapat a Martes ti bulan, manipud ala-una ti bigat agingga alas-kwatro ti malem.
Kabayatanna, adda ti espesial a Konsultasion para kadagiti Senior Citizens iti tunggal Mierkules ti bulan, manipud ala-una agingga alas-tres ti malem.
Para iti mental ken psychosocial well-being, ti klinika ti Mental Health Program Services ket silulukat iti tunggal Biernes ti bulan, manipud ala-una agingga alas-kwatro ti malem.
Kagiddan ti programa iti Wellness and Nutrition Services, a maangay iti tunggal maikatlo a Domingo ti bulan, manipud alas-dos agingga alas-kwatro ti malem, ket paset iti panangitandudo ti umno a nutrision ken nasalun-at a panagbiag.
Segun iti DOH Wellness Clinic, mabalakadan ti publiko a saanda a tagiawanen iti aniaman a sintomas sakbay nga agpakonsulta.
Ti regular a panagpaeksamen, panangmonitor kadagiti napateg a pagilasinan, umno a nutrision, ken pannakagun-od kadagiti medikal a serbisio ket nasken a paset ti panangaywan iti salun-at ti tunggal kameng ti pamilia.
Kadagiti kayatna ti agpakonsulta wenno mangala iti ad-adu pay nga impormasion maipapan kadagiti serbisio ken eskediul, bisitaen lang ti DOH Wellness Clinic iti Level 4 ti Robinsons La Union. (Report by Bombo Ericka Quinzon)
