Pimmusay dagiti lima a tattao ken lima iti nadangran kalpasan a nag-overrun ti maysa nga Amazon Prime Air cargo plane iti runway bayat iti panagdisso daytoy iti Miami International Airport idiay Florida, Estados Unidos, idi Domingo, Setiembre 6. Tallo kadagiti nadangran ket adda iti kritikal a kondision.
Segun ti Federal Aviation Administration (FAA), iti Boeing 767-300, flight 7598 ken ipatpataray ti 21 Air para iti Amazon Prime Air, ket limmabes iti runway iti agarup alas-dos ti malem kalpasan a naggapu iti Luis Muñoz Marín International Airport idiay San Juan, Puerto Rico.
Nadungpar ti eroplano dagiti sumagmamano a lugan kalpasan a limmabes iti runway ken timpuar iti uram. Immuna met a na-trap iti piloto ken co-pilot, kasta met dagiti sumagmamano a tattao nga adda kadagiti lugan a nadungpar ti eroplano.
Nangigubuay iti insidente ti nasaknap a pannakataktak iti operasion ti eropuerto. Mapattapatta a 250 flights iti na-delay idi malem ti Domingo, bayat a temporario a naserraan dagiti runway ken taxiway.
Agtultuloy iti imbestigasion ti FAA ken ti National Transportation Safety Board (NTSB) tapno maammuan no ania iti rason ti insidente.###
