Kiniddaw ti National Bureau of Investigation (NBI) iti Kongreso a mangipasa ti linteg kontra kadagiti social media troll farms, fake accounts, ken AI-generated deepfakes.
Segun kenni NBI Director Melvin Matibag, nupay addan ti Cybercrime Prevention Act of 2012 kontra kadagiti online scams, awan pay ti nalawag a legal a basaran tapno anupen dagiti organisado a troll farm.
Inlawlawagna nga agus-usar dagiti troll farms ti coordinated behavior tapno agparang a lehitimo ken suportado ti publiko iti biddut nga impormasion.
Imbaga ni Matibag a kumarkaro iti problema no iwarwaras dagiti lehitimo nga account dagiti biddut a salaysay.
Laksid ditoy, nakitinnulongen iti NBI iti Meta, a makinbagi ti Facebook, ken naipaikkaten ti nasurok 2,000 a peke nga accounts sipud idi isuna ket nagtugaw iti puesto.
Sumagmamano kadagiti makinbagi ti account ket sumangsangon iti kaso bayat a dagiti dadduma ket agtultuloy a maim-imbestigaran.
Paset iti singasing ti NBI iti regulasion kadagiti AI-generated videos ken images a mangtultulad ti rupa ken boses ti sabali a tao gapu ta mabalin daytoy nga aglabsing iti karbengan ti privacy.###
