Dua a tawen a saan a mabalin nga agmaneho iti aktor a ni Niño Muhlach kalpasan nga in-revoke ti Land Transportation Office (LTO) driver’s license-na, mainaig iti aksidente iti Marcos Highway idiay Antipolo City idi Agosto 23.
Maibasar iti imbestigasion ken panagdengngeg ti LTO, napukawan ti kontrol ni Muhlach iti luganna kalpasan a nakapadas ti nakaro a pannakabannog, a nakaigapuan ti pannakadungparna iti tallo nga establisimiento ken maysa a nakaparada a motorsiklo a nakasugatan ti maysa nga indibidual.
Napaneknekan nga adda ti pagsungsungbatan ni Muhlach iti reckless driving ken naideklara kas Improper Person to Operate a Motor Vehicle, a nagbalin a basaran iti dua a tawen a revocation ti lisensiana.
Agtalinaed met ti alarm status iti lugan tapno masigurado ti pannakaipatungpal ti dusa.###
