LA UNION – Agtultuloy iti ipapaay a livelihood project a Livestock Dispersal ti City Veterinary Office para kadagiti mannalon ditoy syudad ti San Fernando.
Partikular ditoy iti Cattle Dispersal, tapno matulongan dagiti local farmers a maaddaan ti kanayunan a pamastrekan.
Inlawlawag ni Dr. Christopher Apilado, veterinary 1 iti CVO, adda dagiti requirements a rumbeng a masurot ken ma-evaluate a naimbag iti maysa a mannalon nga ag-avail iti nasao a programa.
Kinuna ni Apilado a sakbay a maipaayan ti taraknen a baka, dagiti interesado a mannalon ket mangaramid ti letter of intent a maisumite iti opisina da ken ma-evaluate iti aplikante nu adda met laeng kabaelan na nga agtaraken ti dingwen.
Maysa a requirement ket nasken nga adda bukod a pagpastoran ti mannalon, a saan ketdi a makipas-pastor iti talon ti kaarruba wenno sabali a tao.
Nu maipapan iti bingay iti baetan ti gobyerno ken ti mannalon, iti impataraken a baka ket naan-anay a maited iti nagtaraken nu mapa-anak na iti nasao a dingwen, nga isunto met ti maisubli iti gobyerno ken maipataraken iti sabali a mannalon.
