LA UNION – Nagpaawag iti taripnong ni Municipal Mayor Menchie de Guzman kadagiti kameng ti local IATF tapno pagsasaritaan maipapan iti wagas ti pananglaban ti COVID-19 pandemic kalpasan a nanayunan manen iti bilang ti nakaptan iti nasao a sakit idiay ili ti Bauang, La Union.
Iti naangay a flag raising ceremony idiay Bauang Municipal Plaza ittay bigat, kinuna ti alkalde a 10 ti nainayon iti listaan ti kaso iti COVID-19.
Posible kinunana a manayunan pay kadagiti sumagnad nga aldaw ti nadakamat a bilang gapu ta adu a tattao iti rumrummuar kadagiti pagtaenganda.
Sigun kenni Mayor De Guzman, dakkel a karit daytoy para ti lokal a gobyerno kangrunaan kadagiti front liners maipapan iti panangbalanse iti kinatalged ti salun-at ken ekonomiya iti ili.
Immapela ti alkalde iti kooperasyon ken kinaanus iti tunggal maysa tapno sulusyunan iti parikot kontra iti panagwaras ti COVID-19.
Kabayatanna, gapu iti 10 a nainayon a bilang dagiti nagpositibo iti COVID-19 ket umabot itan iti 23 active cases iti nasao nga ili.
Naipasidong metten iti lockdown ti pagnanaedan dagiti pasyente a masarakan kadagiti barangay iti Payocpoc Sur, Baccuit Sur, Dili ken Acao iti uneg ti 14 nga aldaw para iti contact tracing ken surveillance.
Manarimaan ita iti panangisayangkat ti disinfection kadagiti nadakamat a lugar.
