LA UNION – Agladladingit ita ti maysa a pamilia idiay ili ti Bangar, La Union gapu iti saan a ninamnama a pannakatay ti maysa a lola kalpasan a nagpagabut iti lima a ngipen iti maysa a dentista.
Nabigbig ti biktima a ni Trinidad Maynes, 76-anyos, residente ti Brgy. Ubbog.
Segun iti anakna a Edwin, nagpagabut ti inana iti ngipen iti klinika ti maysa a Dr. Concesa Fioca idiay Brgy. Central West 2 ngem kalpasan ti maysa nga aldaw ket saan a nagsardeng iti panagdara ti gugotna.
Gapu iti daytoy, inikkan met iti medikasion ti dentista tapno agsardeng ti panagdara ti gugotna ngem limteg latta isu nga intarayda iti Ilocos Sur District Hospital idiay ili ti Tagudin, Ilocos Sur agingga a nayakar ken na-confine iti Ilocos Training and Regional Medical Center ditoy San Fernando City, La Union.
Iti baet daytoy ket pimmusay latta ni Maynes gapu iti acute respiratory failure ken nalaus a panagdara ti gugotna, gastrointestinal bleeding, schemic heart disease ken congestive heart failure.
Naituding met a maipasidong iti otopsia ti bangkay ti lola.
