LA UNION – (Update) Pimmusayen iti 69-anyos a baket gaputi nakaru a head injury a sinagaba na kalpasan a pinang-or iti suspek a maipagarop nga addaan diperensiya iti panunot.
Nabigbig daytoy a ni Felomina Biniegas ti Barangay San Simon East, Aringay, La Union.
Kabayatanna, iti suspek a managan Christopher Labadero,30, baro, residente ti nasao met laeng a lugar ket agtaltalinaed idiay Baguio General Hospital, Baguio City.
Nakumpirma nga agsag-sagaba daytoy iti mental disorder.
Maipalagip a ti agkabsat a Felomina ken Eulalio Biniegas, 71-anyos, ket pinang-or ti suspek iti 2×3 a kapuskol ti kayo, itay kallabes gaputi rason a saan nga ingkaskaso dagiti agkabsat iti arungaing ti suspek a panangipa-tarimaan iti us-usaren na a water pump.
Kas resulta, nagsagaba ti nakaru a pannakadun-dunor dagiti agkabsat partikular iti ulo ken dadduma pay a paset ti bagi dagitoy, a puon ti nakatayan iti baket.
Kabayatanna, ni Eulalio ket agtaltalinaed iti Ilocos Training and Regional Medical Center (ITRMC) ken manamnama a maipasidong iti operasyon gaputi nakita a dara a nagbalay iti ulo daytoy.
