LA UNION – Pimmusay ti 76-anyos a lola kalpasan a madungpar iti maysa a motorsiklo iti national highway a masakupan ti Barangay Gana, Caba, La Union.
Nabigbig ti biktima a ni Susana Sersenia, residente iti nadakamat a lugar.
Iti impormasyon a nakalap iti Bombo Radyo La Union manipud iti Caba Police Station, nakatatder ti biktima iti laud a ngalay ti kalsada kadwna iti sumagmamano a kameng ti pamilyana idi nadungpar daytoy iti motorsiklo a minaneho ni Henry Sarmiento, 23-anyos, single ken residente iti Barangay San Nicolas West, Agoo, La Union.
Maipagarup a daldalyasaten ti motorsiklo ti abagatan a direksyon iti innerlane iti kalsada idi nga immagaw daytoy iti linya iti kannawan a paset iti kalsada kasaruno ti pannakadungparna ti biktima.
Agpada a naipurwak ti driver ken ti biktima gapu iti kinapigsa ti pannakaidungpar ti nasap a lugan.
Naitaray pay iti Caba District Hospital ni Sersenia ngem naideklara daytoy a dead on arrival babaen iti doktor.
Naglak-am iti sugat ti naduma-duma a paset ti bagina ti respondent driver ken naduktalan a positibo daytoy a nakainum iti arak.
Iti agdama, agtaltalinaed iti kustodiya iti Caba Police Station ti respondent driver para iti pannakaidatag iti kaso.
Naamwan a naggapu iti meeting iti kapilya ti biktima, bayat a paawiden manipud iti inuman ti respondent driver idi napasamak ti insidente.
