LA UNION – Isagsaganan ti pulisya ti kaso kontra iti maysa a 72-anyos a lolo gapu iti maipagarup a panagikotna iti naduma-duma a kita iti paltog ken bala idiay ili ti Agoo, La Union.
Nabigbig ti suspek a ni Victor Gallardo, residente ti Barangay San Juan iti nasao nga ili.
Naammuan ti Bombo Radyo manipud iti Agoo Police Station,rinaut dagiti operatiba ti nasao a balay kalpasan nga inyatnag ni Agoo, La Union Regional Trial Court Branch 31 Judge Romeo M. Atillo Jr. ti search warrant gapu iti impormasyon nga adda iti iduldulin nga igam ti suspek.
Iti panagalikad dagiti pulis, nakompiskar iti pito a paltog a pakaibilangan ti maysa a converted cal. 22 rifle nnga awanan ti serial number; uppat a units ti cal .357 revolver; ken dua a units ti cal. 38 revolvers.
Karaman pay kadagiti nakompiskar iti maysa a cartridge box a naglaon iti naduma-duma a kita iti bala ti paltog.
Gapu kadagiti nakompiskar nga igam ket sumangio iti kaso nga illegal possession of firearms and ammunitions ti nasao a suspek a nakabalud ita idiay kwerpo ti pulisya.
