LA UNION – Dead on arrival idiay ospital ti maysa a lolo kalpasan a maatake daytoy iti puso ken malmes idiay Amburayan River idiay ili ti Bangar, La Union.
Nabigbig ti biktima a ni Anacleto Garlejo, 66, residente ti Barangay Ma. Cristina West ti nasao nga ili.
Sigun kenni C/Ins. Rogelio Miedes, hepe ti Bangar Police Station, maipagarup a nasarakan ti maysa a binatilyo ti bagi ti lolo a tumtumpaw iti karayan kasaruno ti panagkiddawna ti arayat kadagiti residente.
Naammuan a nagturong ti biktima idiay karayan tapno agkalap.
Base met iti kinuna ti pamilya ti lolo, mabalin nga inatake iti puso ti biktima gapu ti sagsagabaen daytoy nga altapresyon.
