BR LA UNION – Banbantayan ti state weather bureau ti maysa a low pressure area (LPA) iti uneg ti Philippine territory.
Naudi a nasaripatpatan daytoy iti kaadayu a 910 kilometro daya ti Northeastern Mindanao.
Nupay kasta, ti easterlies iti agtultuloy a mangapektar iti pagilian, a mangipapaay ti nabara a panawen ken sagpaminsan a panagtudo.
Kabayatanna, maysa met a tropical depression ti namonitor nga adda iti ruar ti Philippine Area of Responsibility (PAR).
Naudi a nasaripatpatan iti kaadayu a 2,560 kilometro daya ti Northeastern Mindanao.
Kabuyog ti angin a 55 kilometro kada oras asideg iti sentro ken kapegges nga umabot agigga 70 kilometro kada oras.
Dup-dupagenna iti direksyon nga amianan amianan-a-laud ngem nabuntog.
Nupay awan ti direkta nga epekto na ditoy pagilian ti nasao a tropical depression, binalakadan iti publiko nga agtalinaed nga alerto iti sumaganad nga abiso dagiti eksperto, ingkaso a sumrek iti PAR ken mangigubway ti panagbaliw ti kasasaad ti panawen.
