LA UNION – Maysa a Locally Stranded Individual (LSI) iti naudi a nagpositibo iti COVID 19 ditoy probinsiya ti La Union.
Daytoy ket kalpasan a kumpirmaren ti DOH CHD1 ken base iti official statement ti Provincial Gov’t. of La Union.
Inyanunsiyo met ni San Gabriel Mayor Herminigildo Velasco iti umuna a kaso ti Covid-19 iti ili da, maysa a 43-anyos a lalaki ti Brgy. Bayabas, San Gabriel ken nagtrabaho kas construction worker idiay Mandaluyong City.
Segun iti impormasyon, nagabang daytoy ti van tapno makaawid ditoy La Union manipud Manila idi July 26 kadwa na iti dua pay nga indibidwal a nagawid met iti kabangibang nga ili.
Nupay kasta, inlawlawag dagiti maseknan a saan pay a nakastrek ti nasao a pasyente idiay ili ti San Gabriel agsipudta dagus a naipasidong iti Provincial Isolation Facility (Home of Hope) ditoy syudad ti San Fernando, kalpasan a nagpositibo iti covid 19.
Paset iti maipatpatungpal a safety protocols tapno maliklikan iti panagsaknap ti covid 19, ket rumbeng a maipasidong iti swab test dagiti sumsumrek nga LSIs ditoy probinsiya, sakbay dagitoy a mapalubosan nga agawid iti bukod da a pamilya nu negatibo iti swab test.
Iti agdama, nagtignayen ti contact tracing team tapno amwen nu siasino dagiti dua nga indibiduwal a kadwa ti pasyente iti naglugan da a van.
Iti probinsiya ti La Union ket nakailistan ti 76 total COVID 19 cases kabilang iti 35 active cases, 32 dagiti recoveries, ken pito ti natay gapwanan ti COVID 19.
