Kitkitaen ti Land Transportation Franchising and Regulatory Board (LTFRB) ti pannakaipatungpal manen ti service contracting kas sungbat iti agtultuloy a panagngato ti presio dagiti produkto ti petroleo, malaksid pay ti fuel subsidy.
Babaen ti Service Contracting Program (SCP) ti Department of Transportation (DOTr) ken LTFRB, direkta a kontrataen ti gobierno dagiti public transport operators nga agbiahe kadagiti rutada. Iti daytoy a sistema, umawat dagiti tsuper ti sueldo a nakabasar iti bilang ti biahe wenno distansia a namaneho, imbes nga iti bilang dagiti pasahero.
Panggep ti programa a siguraduen ti regular a kita dagiti driver ken operator, kangrunaan iti panawen ti krisis, ken in-inut a sukatan ti tradisional a boundary system. Naipatungpal met daytoy iti kangitingitan ti pandemia kas paset iti tulong ti gobierno iti sektor ti transportasion.
Segun kenni LTFRB Chairman Atty. Vigor D. Mendoza II, maysa laeng daytoy kadagiti pagpilian nga ad-adalen ti DOTr no bilang kumaro iti tension idiay Middle East, a mabalin a pakaigapuan ti kanayonan a panagngato ti presio ti lana.
Karaman met kadagiti maikonsiderar iti posible a probisional a panagngato ti plete, a dumalan iti nainget a pananganalisar maibasar iti manamnama nga epekto ti panagngina ti krudo.###
