LA UNION – Nangisayangkat ti inspeksiyon iti naduma-duma a bus terminal ken random monitoring kadagiti pampubliko a behikulo ditoy probinsiya ti La Union iti Land Transportation and Franchising Regulatory Board (LTFRB)Region One, iti panangidaulo ni Atty. Anabel Nullar-Marzan kas chief transportation development officer.
Iti nasao a ganwat ket paset iti Oplan Semana Santa 2021 ken tapno masiguro a maipatpatungpal dagiti naipaulog nga allagaden ken annuruten a manglapped iti lalo pay a panagwaras ti sakit a COVID 19 ita a panawen ti pandemya.
Naobersabaran ti LTFRB Region 1 enforcers a narasay dagiti biyahero idi kalman, Huwebes Santo, gapu kadagiti napairutan a baro a border entry protocols nga impaulog ni La Union Governor Francisco Emmanuel Ortega III.
Iti sidong ti Executive Order No. 7, series of 2021, temporaryo a suspendido iti amin a ganwat ken aktibidad nga adda pakainaigan na iti turismo ken semana santa, nangrugi idi Marso 31 agingga Abril 15 agdama a tawen.
Kaipapanan daytoy a dagiti saan a residente ditoy La Union ket saan pay laeng a mapalubosan a makastrek iti probinsiya malaksid kadagiti APORs wenno Authorized Persons Outside their Residence, ngem kasapolan a makaiparang dagitoy kadagiti naiyetnag a dokumento wenno requirements, maiyannurot iti Executive Order No. 3, Series of 2021.
Kas koma iti NAPANAM QR Code, valid ID, negative RT-PCR wenno Saliva-based Test Result ken dadduma pay.
Amin dagitoy ket para iti kinatalged ti tumunggal maysa kontra iti makaakar a sakit a COVID 19.
Naobserbaran nga iti napalabas a sumagmamano nga aldaw ket napaliiw iti kellaat a panagngato ti kaso iti COVID 19 ditoy probinsiya kalpasan a napalukayan dagiti border entry measures tapno biagen iti ekonomiya kalpasan ti maysa tawen a COVID 19 pandemic.
