LA UNION – Suportado ti Land Transportation Franchising and Regulatory Board wenno (LTFRB) Regional Office One, iti kadawatan ti transport groups a fare hike kadagiti pampubliko a behikulo nangruna kadagiti pang-pasahero a dyip.
Iti pannakiuman ti Bombo Radyo La Union kenni LTFRB Region I Director Nasrudin Talipasan, kanunongan na iti kidkiddawen a fare hike dagiti drivers ken operators kadagiti pang-pasahero a behikulo tapno tulongan dagitoy iti panagbiag ken makasurot da iti ngumatngato a cost of living.
Kabilang pay dagiti rason nu apay a panawen metten tapno patgan ti kadawatan a fare hike ket iti ngumatngato a presyo dagiti gagatangen, spare parts dagiti lugan, petrolyo, serbisyo, ken dadduma pay.
Maipalagip nga idi pay napalabas a tawen nga impila dagiti transport groups iti petisyon a fare hike.
Posible kuna ni Talipasan a maaprubaran ti petisyon ita a tawen, iti P2.00 fare hike iti intero a pagilian.
