LA UNION – Nangidatag ti Land Transportation Office (LTO) ti show cause orders kontra kadagiti 24 a truck owners nga agbibiyahe nga addaan iti nadadael a goma.
Segun kenni LTO Chief Vigor Mendoza III, naduktalan dagiti enforcers da nga agtultuloy ti panagdalyasat dagiti truck nga adda iti sidong dagiti operators nga addaan iti worn-out tires a nainget nga iparit ti nasao nga ahensiya.
Daytoy ket gapu iti mandato ti LTO kadagiti rehistrado a truck owners nga iturong dagiti trakda iti ahensiya para iti “Road Worthiness Inspection” a nainget nga ipatpatungpal ti LTO.
Kabayatanna, gapu iti daytoy ket obligado dagiti operator a mangisubmitir iti written ken notarized explanation no apay a saanda a maidatagan ti kaso babaen iti panaglabsing ti Republic Act 4136 wenno Land Transportation and Traffic Code.
Inlawlawag ni Mendoza, maysa laeng daytoy kadagiti addang nga impatungpal ti LTO para iti nataltalged a kalsada para kadagiti motorista ken commuters.
