LA UNION – Iti panaglukat ken panagsubli iti operasyon ti naduma-duma nga opisina ti gobyerno ditoy rehiyon uno iti tengnga ti covid crisis, agtultuloy ti nairut a pannakaipatungpal dagiti health ken sanitary protocols iti sidong ti General Community Quarantine (GCQ).
Ngem iti panagsubli ti operasyon dagiti opisina tapno agserbi kadagiti umili, makuna a limitado pay laeng iti transaksiyon, maiyannurot iti maipatpatungpal a work scheme iti tunggal opisina ken ahensiya.
Daytoy ket iti tarigagay a maprebentaran iti transmission ti covid 19 kadagiti tattao.
Iti Environmental Management Bureau wenno EMB-Region One iti sidong ti Department of Environment and Natural Resources (DENR), nairut a maob-obserbaran dagiti health protocols kas precautionary measures kontra coronavirus.
Malaksid iti maipatpatungpal a “no face mask no entry policy”, nasken a dumalan dagiti empleyado ken kliyente iti shoe bath babaen ti disinfectant, thermal scanner para iti temperature check, hand sanitation, ken social distancing.
Kabayatanna, segun met kenni Asst. Reg’l. Dir. Kathleen Deanna Salayog ti LTFRB-Region 1, agsublin iti operasyon ti LTO ita nga aldaw, Mayo 13, ngem masurot latta iti naduma-duma a health protocols.
Naamwan nga adda dagiti opisina ti gobyerno a nakalukat manipud Lunes agingga Biyernes ngem adda met dagiti mangsursurot iti 4 day work week a panagtrabaho, kas iti GSIS KEN OWWA Region-1.
