Agtaltalinaed a suportado ti Mayors for Good Governance (M4GG) iti nagbalin a desisyon ni Baguio City Mayor Benjamin Magalong nga aglosolosen kas miembro ti Independent Commission for Infrastructure (ICI), kasaruno kadagiti alegasyon dagiti ghost ken substandard projects.
Bigbigbigen da ti panagtignay ni Magalong para iti transparency ken accountability kasta met nga agtalek da a paset laeng daitoy iti nalawlawa a panangdadael ti nasayaat a liderato.
Nangiruar met ti waragawag iti Quezon City government ken impadanon met ti panagtalek da kenni Magalong kas convenor iti M4GG, kabinnulig da iti panangitandudo iti nasayaat a reporma.
Imbatad dagiti Mayor a plano da a mangisayangkat ti bukod nga imbestigasyon kadagiti proyekto a dakdakamaten ni Magalong ken inkeddeng nga ibinglay dagiti impormasyon idiay ICI tapno makatulong iti panagadal da.
Impaganetget ti grupo a saan a rumbeng a matagiawan dagiti alegasyon nangruna ta adda epekto na daitoy iti talek ti publiko kadagiti proyekto ti gobierno.
Nagpanawagan da met kadagiti dadduma pay a lokal nga opisyal nga agbalin a vigilante ken makipamaysa iti panangitandudo ti integridad iti serbisyo publiko.
Laksid iti desisyon na ket agtaltalinaed latta ni Magalong kas aktibo a lider ti Mayors for Good Governance ken kinunana nga itultuloy na nga itandudo dagiti inisyatiba para iti good governance.
