BR LA UNION – Inladawan ni testigo a ni Ramil Madriaga bayat ti panagdengngeg idiay Kamara ti kadakkel ken langa ti large dark duffle bag a maipagarop a nagikargaan iti agingga P35 milion confidential funds a maipagarup nga impa-deliver ni Bise Presidente Sara Duterte.
Iti pannakaituloy ti imbestigasyon ti House Justice Committee idi kalman (Abril 14), kwinestiyon ni Manila 3rd District Representative Joel Chua ti nagduduma a panangiladawan ni Madriaga iti dua a sinapataanna salaysay.
Napaliiw ti mammanday linteg nga iti umuna a dokumento ket nadakamat na ti duffle bag, idinto nga iti supplemental affidavit-na ket inladawan na dayta kas large dark bags.
Iti panangi-lawlawagna, pinasingkedan ni Madriaga a ti nausar ket dakkel unay a dark duffle bag.
No ikumpara kadagiti sample bag a naipakita iti hearing, impaganetget ti testigo a mamitlo agingga mamimpat a daras a dakdakkel ti orihinal a bag nga inawitna.
Inlawlawagna pay nga awan ti pilid ti nasao a bag, nalawlawa ken napuspuskol kumpara iti naipakita iti screen ti komite.
Ti nasao a detalye ket kanayunan iti napalabas a rebelasyon ni Madriaga idi intudona ti Bise Presidente a direkta a nangibilin ti pannakai-deliver ti pondo iti Opisina ti Ombudsman, idiay Laguna ken iti maysa a lokasyon a maawagan iti Nomu Bashu.
