LA UNION – Masampaan iti kaso nga administratibo idiay opisina ti Department of Education (DepEd) – Division of La Union dagiti nagannak ti elementary pupil a dinangran iti maestrana kabayatan nga addada iti uneg ti classroom ti Bacnotan Central School idiay ili ti Bacnotan, La Union.
Iti pannakiuman ti Bombo Radyo iti ina ti nasao nga ubing, kinunana a nasakit pay laeng ti nakemda kenni Teacher Lorna Carbonell gapu iti panangdangran ken panangibabain iti anakda.
Sumagmamano nga aldawen a saan a sumsumrek iti klase ti ubing gapu iti buteng iti maestrana ken panggepda pay a temporaryo a pagsardengen daytoy iti panagadal.
Agturongda idiay opisina iti DepEd tapno idatag ti reklmoda kontra ti nasao a maestra.
Kabayatanna, nag-istorya met ti ubing maipapan ti nagbalinna a kapadasan manipud kenni Teacher Carbonell.
Inakklonna a mabutbuteng pay laeng a sumrek daytoy iti pagadalan gapu ta baka pagbabaraan isuna ti maestra.
Immuna iti daytoy, nagkiddaw iti pammakawan para ti pamilya iti ubing ti maestra babaen ti pannakiuman ti Bombo Radyo.
Nagwaras iti social media ti video nga in-record iti kaklase ti ubing iti panangdangran ti nasao a maestra kabayatan nga addada iti uneg ti classroom ti nasao a pagadalan.
