Inladawan ni Baguio City Mayor Benjamin Magalong kas ‘pampalag-an rikna’ iti maipangarop a nangatngato a posisyon no pilyen na iti agresign kas alkalde ti Baguio.
Segun kenni Magalong, mas epektibo isuna kas imbestigador no nagtalinaed isuna kas paset ti Independent Commission for Infrastructure (ICI).
Napateg kunana iti akem ti maysa nga imbestigador iti ICI agsipud ta isuna iti mangammiris kadagiti amin nga isyu a mangliklikmot iti public infrastructure, karamanen iti personal a panagsarungkar kadagitoy – banag nga adayo ken naiduma iti akem dagiti commissioner.
Iti trabaho ti ICI ket umdasen tapno matakuatan dagiti anomalya a mangbalbalkot kadagiti public infrastructure project ken maibutaktak dagiti responsable nga indibidual.
Saan met nga opsion nga agresign isuna kas alkalde ti Baguio City gapo ta pinili isuna dagiti botante tapno agserbi.
Tinakderan na pay a kabaelan nga akemen dagiti dua a posisyon – kas mayor ken imbestigador, kangrunaan ta mismo nga iti Palasyo ti Malakanyang iti nagaramid ti wagas tapno mairaman isuna iti ICI.###
