Apagapaman a bimmuntog ti 6.1 percent iti implasion iti Pilipinas idi Agosto manipud iti 6.2 percent idi Hulio, ngem agtaltalinaed a kangrunaan a pagtataudan ti pressure iti panaggastos dagiti pamilia iti taraon.
Segun ti Philippine Statistics Authority (PSA), bimmaba iti food inflation ti 4.6 percent manipud iti 5.3 percent idi Hulio, a kangrunaan a gapu iti bimmaba a presio dagiti nateng, root crops, saba ken pulses. Bimmuntog met iti panagngato ti presio ti ikan ken dadduma pay a seafood agingga iti 6.6 percent manipud iti 7.8 percent.
Nupay kasta, ngimmato iti implasion ti bagas iti 19.4 percent manipud iti 17.1 percent, idinto a pimmartak met iti panagngato ti presio dagiti prutas ken mani, kasta met ti arina, tinapay ken dadduma pay a cereal products.
Agtaltalinaed a kadakkelan iti ambag ti food ken non-alcoholic beverages iti pakabuklan nga implasion, nga addaan ti 1.8 percentage points wenno 28.8 percent iti dagup nga implasion idi Agosto.
Kabayatanna, kenuna ni Agriculture Secretary Francisco P. Tiu Laurel Jr. nga umdas iti suplay ti taraon iti agdama, pakairamanan ti bagas, gapu iti panagapit ken nasapa a panagangkat kas panagsagana iti manamnama nga epekto ti El Niño. Nupay kasta, impakdaarna a mabalin a ngumato ti presio dagiti nateng ken lames kadagiti sumarsaruno a lawas gapu kadagiti bagyo, napapigsa nga Habagat, layus ken pannakataktak iti panagayus dagiti produkto.###
