Kalpasan a dimmar-ay iti lamay ken makipamunpon iti kabagda a pimmusay idiay Bicol isunda met ita ti malamayan kalpasan nga mairaman iti aksidente idiay Brgy. Aguso, Tarlac City.
Iti pannakiuman ti Bombo Radyo La Union kenni Barangay Reynaldo Viduya, kinuna na nga idi pay laeng aldaw ti Martes a nagturong idiay Bicol ti agkakabagyan tapno makilamay iti pimmusay a kabagyanda.
Nakllaat da laengen idi a maamuan nga nairaman iti aksidente ti naglugananda kabayatan iti panagawid da ditoy La Union.
VC – BRGY CAPT. REYNALDO VIDUYA
Immuna iti daytoy, nabigbig dagiti pimmusay a da Jemor Bueno, 58-anyos, ti Leones West Tubao, La Union, driver ti Hi-Ace van ken naideklara a dead arrival; dagiti pasahero a da Teresita Basadre, Silvestre Basadre, anak da a ni Gerald Rei Basadre, 31, Lolita Marzan ken Andrea Duran agpapada a taga-Tubao, La Union.
Kabayatan na, naiyakar met iti ospital idiay probinsya ti Pangasinanan ti dadduma a nasugatan nga pasahero ti van idinto nga agtaltalinaed iti Tarlac Provincial Hospital dagiti pasahero ti nakadinnungpar a bus.
Iggem pay laeng dagiti otoridad ti driver ti Santrans bus a ni Pepito Dela Luna, 55, residente ti Caingin, San Rafael Bulacan a sumangsango iti kaso.
Immunan a kinuna ti pulisya nga agturong iti abagatan a direksyon ti van idi dimmungpar daytoy iti bus manipud iti kasungani a direksyon a nagresulta iti panagdinnungpar.
Malaksid iti dua a lugan ket nairaman met ti maysa nga balay iti igid ti national highway ken maysa pay a tricycle a nakaparada iti compound.
