LA UNION – Nailista iti maika-lima a kaso ti COVID 19 ditoy syudad ti San Fernando idi kalman, July 11.
Base daytoy iti official statement ti lokal a gobyerno babaen kenni City Mayor Alf Ortega ken panangkumpirma met ni Dr. Rhuel Bobis, Medical Officer 4 ti DOH Region 1.
Iti maika-5 a kaso ket maysa a 36-anyos a babae, residente ti Barangay Cadaclan ken agtrabtrabaho iti Regional Trial Court (RTC) ditoy syudad.
Maysa daytoy kadagiti makunkuna a close contact wenno nakapolapol ti immuna nga RTC employee a nagpositibo iti sakit.
Kas panagtungpal kadagiti health protocols, nagpaisidong daytoy iti RT-PCR swab test, ket positibo iti resulta na.
Maipagarop a nakarikna daytoy iti panagsakit iti ulo ngem adda metten iti nasayaat a kondisyon bayat nga agtaltalinaed iti isolation facility ditoy syudad.
Gaputi nasao a kaso, dagus nga impasidong ni Barangay Chairman Samuel “Amming” Jucar iti Sitio Patad Sur, Barangay Cadaclan, San Fernando City, La Union iti total lockdown.
Nangrugi idi kalman, maikabil iti strict monitoring dagiti 71 a pamilya nga agnanaed iti nasao a lugar.
Narugyan metten ti contact tracing iti amin a nakapolapol ken dagiti lugar a nagturongan iti nasao a covid patient.
Immunan a naipadamag, nga iti immuna nga empleyado ti RTC Br 28 a nagpositibo iti coronavirus ket nagawid idiay Caloocan City ken napan nakilamay iti cabagyan na a mapapati a na-infect ti covid 19, a sadiay iti mapapati a nakaalaan na ti virus.
Nagsubli iti apartment na idiay ili ti Bauang idi June 28 ken nagreport iti trabaho na iti korte ditoy syudad idi June 29.
Naamwan na iti resulta ti RT-PCR test daytoy a positibo iti COVID 19 ket nagawid idiay Caloocan City idi July 2.
