LA UNION – Naminsan manen a nilagip iti pulisya ken iti pamilya dagiti 44 a kameng ti Special Action Force wenno SAF44 iti maikalima a tawen nga anibersaryo ti Mamasapano massacre a napasamak iti January 25, 2015.
Idiay ili ti Luna, La Union nangisagot iti kararag dagiti kameng ti La Union Police Provincial Office (LUPPO) ken dagiti naulila a pamilya ni PO3 Omar Nacionales a maysa kadagiti 44 a pulis a natay iti enkwentro, lima a tawenen ti napalabas idi a tiliwenda ti terorista a ni alyas Marwan idiay ili ti Mamasapano, Maguindanao.
Sigun kenni LtCol. Silverio Ordinado Jr., spokesperson ti LUPPO, mangnamnamada ken iti pamilya ni Nacionales a dumteng met laeng iti gundaway a maipaayan ti hustisya iti saan a nakailintegan a pannakapapatay dagiti SAF44.
Iti laksid ti pannakaibasura ti Sandiganbayan iti naidatag a kaso dagiti sumagmamano nga opisyal ti pulisya a maipagarup nga addaan ti pakainaigan ti nasao a pasamak ket ipabus-oyda laengen ti korte iti mabalin a pagbanagan ti naisampa a reklamo.
