LA UNION – Simmangpeten iti maikapat a batch dagiti bakuna kontra Coronavirus Disease (COVID-19) para iti agtultuloy a vaccine rollout iti intero a rehiyon uno.
Base iti nakalap nga impormasyon ti Bombo Radyo La Union manipud kenni Dr. Rhuel Bobis, Medical Officer IV ti DOH-CHD Region 1, adda iti pakabuklan a 54,400 doses ti sinovac vaccines iti simmangpet pasado alas 2:00 idi malem kalman.
Dagus a naiturong dagiti bakuna iti Regional Vaccine Storage Facility iti DOH Region 1.
Manamnama nga ita nga aldaw ti Miyerkoles, June 9, ket maitulod iti uppat a Provincial Health Offices ditoy rehiyon, a pakairamanan iti PHO-La Union, dagiti bakuna ken maitudok iti kabiitan a panawen kadagiti prayoridad nga indibiduwal.
Segun kenni Dr. Bobis, dagiti nasao a bakuna ket para kadagiti nabatbati a healthcare workers and frontliners, senior citizens, ken person with comorbidities a saan pay a nabakunaan.
Kabayatanna, siniguro ni Dr. Bobis a protektado ken saan a naapektaran iti panagtudo na idi kalman, dagiti simmangpet a bakuna kontra COVID-19.
