Natiliw ti dua a maatap a drug dealer kalpasan ti buy-bust operation nga insayangkat ti City of San Fernando Police Station babaen ti pannakitinnulong ti Philippine Drug Enforcement Agency Regional Office 1 idi agsapa ti Pebrero 19, 2026 idiay Barangay Santiago Norte, siyudad ti San Fernando.
Maibasar iti report, naisayangkat ti operasyon manipud alas 8:40 agingga alas 10:00 ti bigat, ken nagresulta daytoy iti pannakatiliw dagiti suspek nga agtawen ti 53 ken 37, agpada a residente ditoy siyudad.
Nakumpiskar dagiti otoridad iti tallo a heat-sealed transparent plastic sachet ti mapapati a shabu, agdagsen ti aganay maysa a gramo ken mapatta-patta nga addaan ti street value a Php6,800.00.
Narekobre pay iti operasyon ti dua a cellphone, maysa a motorsiklo, buy-bust money, ken nadumaduma a drug paraphernalia.
Naisayangkat ti inventory ken marking of evidence iti nakapasamakan ti operasyon iti sanguanan dagiti suspek ken testigo, bayat a nairekord ti sibubukel a proseso babaen ti body-worn camera.
Dagiti suspek ket sumangsango ti kaso a panaglabsing ti RA 9165 wenno Comprehensive Dangerous Drugs Act of 2002.
