LA UNION – Dagiti kandidato iti kina-presidente ken bise-presidente idiay Amerika ket mabotosan babaen iti popular vote ken Electoral College.
Iti eksklusibo nga interview ti Bombo Radyo La Union kenni Atty. Joel Gines, Provincial Election Supervisor ditoy La Union, imbinsa-binsa na iti proseso ti eleksiyon ken wagas ti panagbotos dagiti umili ken estado idiay Amerika.
Kinunana nga iti U.S. elections, dagiti kandidato ket mabotosan babaen iti maaw-awagan a popular vote wenno botos dagiti tattao ken babaen iti electoral college wenno botos dagiti “electors” wenno dagiti mangibagbagi ti tunggal estado.
Iti agdama, napigpigsa iti Presidential Election Polls iti Democratic Candidate a ni Joe Biden kumpara kenni incumbent Pres. Donald Trump.
Maiyannurot iti konstitusyon ti Amerika, maisayangkat ti eleksiyon idiay Estados Unidos kada uppat a tawen, iti tunggal umuna nga aldaw ti Martes iti bulan ti Nobyembre.
Adda iti uppat a paset wenno proseso iti eleksiyon idiay Amerika.
Umuna, iti Presidential Primaries ken Caucuses, daytoy ket proseso a panangpili ti tunggal estado iti agbalin a nominado a kandidato dagiti partido.
Adda iti dua a kangrunaan a political party idiay Amerika, iti Democratic ken Republican.
Ita nga 2020 US Presidential Election, ni Trump iti kandidato ti Republican Party bayat a ni Biden iti Democratic Party.
Maikadwa a proseso, panangisayangkat ti national conventions wenno panagpili ti tunggal partido iti agbalin a kandidato dagitoy iti kina-presidente.
Maikatlo, panangisayangkat ti general election. Iti nasao a proseso, agbotos dagiti umili idiay Amerika ngem saan pay a daytoy iti mangdiktar nu siasino iti mangabak a presidente.
Daytoy ket basaran laeng dagiti “electors” nga isuda ti direkta nga agbotos para iti Electoral College, nga isuti maikapat ken maudi nga addang iti eleksiyon.
Adda iti pakabuklan a 538 nga electors iti intero nga Amerika.
Tapno mangabak, kasapolan iti maysa a Presidential Candidate a magun-od ti majority votes a 270 votes manipud kadagiti electors.
Iti bilang dagiti electors ti tunggal estado ket maibasar iti bilang dagiti mangibagbagi da idiay Kongreso.
Idiay ti estado ti California ti addaan kaadwan nga electors nga umabot ti 55.
Nu siasino iti lamang a kandidato, magun-od na amin a botos wenno “winner take all” a kas kinuna ni Atty. Gines.
Kas ti napasamak idi 2000 elections, nangabak ni Democratic Presidential Candidate Al Gore iti popular votes kontra kenni George W. Bush ngem nangabak isuna iti electoral vote.
Uray idi 2016 Presidential Election, nangabak ni Trump kas Presidente babaen iti nagun-od na a 306 electoral votes, iti laksid a naabak iti national popular vote kenni Hillary Clinton iti aganay 3 million votes.
Iti kapatgan a lag-lagipen nu maipapan iti eleksiyon idiay U.S., nga iti maipatugaw a Presidente ket mapili babaen iti electoral college, saan ketdi a babaen iti popular vote.
