Nagpanawagan ti Malacañang kenni Davao City Mayor Sebastian “Baste” Duterte nga ipangruna iti panangtaming iti kasapulan dagiti umili a naapektaran iti panaglayus imbes nga unaen ti panagpulitika ken panangbabalaw iti administrasion ni Presidente Ferdinand Marcos Jr.
Daytoy iti sungbat ni Palace Press Officer Claire Castro kalpasan a binabalaw ni Mayor Duterte iti administrasion iti naangay a PDP-Laban National Assembly.
Segun kenni Castro, nasaysayaat no ipamaysa ti mayor iti kasasaad ti masakupanna ken dagiti programa ti gobierno para kadagiti apektado a komunidad.
Mainaig iti impeachment trial ni Bise Presidente Sara Duterte, inpaganetget ni Castro a maysa daytoy a proseso ti Kongreso ken awan ti pakainaigan ni Presidente Marcos.
Kenunana, no plano ti Bise Presidente iti agkandidato para iti kinapresidente iti masakbayan, napateg a malawlawagan nga umuna dagiti isyu a sangsanguen daytoy, pakairamanan iti isyu ti confidential funds ken mapapati a saan a nailawlawag a kinabaknang.###
