Nainget a pinaglibakan ti Malacañang Press Corps (MPC) a maus-usar wenno mabaybayadanda tapno akkuban iti pudno a kasasaad ti salun-at ti Presidente.
Iti nairuar nga official statement, impaganetget ti MPC nga ammoda iti kinapateg ti salun-at ti Presidente kas paset iti seguridad ti pagilian.
Segun ti MPC, makita iti napalabas a report ken press briefing no kaso ti kinaingetda nga agdamdamag kadagiti opisial ti gobierno seknan iti isyu.
Tinakderan met ti MPC iti kredibilidad dagiti reports-da kadagiti napalabas a lawas.
Kinondena-da iti arigna pananggandat a dadaelen ti reputasyon dagiti journalist ken iyaw-awan iti publiko para iti bukod nga interes dagiti dadduma.
Dagiti ipadpadamagda ket nakabasar iti beripikado nga impormasion manipud kadagiti mapagtalkan a source ken iti bukod-da a nasaksian.
Impasigurado-da a dumaldalan iti naan-anay a beripikasyon iti tunggal detalye sakbay a mairuar iti publiko.
Iti sabali a bangir, binabalaw ti MPC dagiti sumagmamano a content creators a maipagarup nga agiwarwaras ti impormasion nga awan ti umdas a basaran ken mangnamnama laeng iti social media, imahinasyon, ken kwestionable nga agenda.
Pinaregta ti grupo iti publiko nga agbalin a kritikal kadagiti impormasion a makitkita online, kangrunaan iti tengnga ti panagwaras dagiti alegasyon ken biddut a damag iti social media.
Iti laksid dagiti pammabalaw, impasigurado ti MPC nga agtultuloy nga aramiden ti trabahoda nga agdamag, agsiput, ken patas nga agipadamag para iti pagsayaatan ti umili.
Impaganetget-da pay nga agtaltalinaedda a dasig iti kinapudno ken interes ti pagilian, aniaman a karit ken sino man ti nakatakem iti Malacañang.###
