BR LA UNION – Siniguro ti Palasyo ti Malacañang a saan a maitantan dagiti proyekto ken operasyon ti gobyerno iti tengnga ti impeachment proceedings kontra kenni Vice President Sara Duterte.
Segun kenni Palace Press Officer USec. Claire Castro, agtultuloy iti trabaho ti ehekutibo iti laksid ti anyaman nga isyu ken saan da nga ipalubos a maitantan dagiti programa ti administrasyon gapu kadagiti “obstructionists.”
Iti biang ti Senado, impaganetget ti Malacañang nga adda bukod a mandato dagiti senador kas impeachment court ken mammanday linteg, ket namnamaen nga aramiden da ti pagrebbengan dagitoy.
Mangnamnama iti Palasyo nga awanen ti mapasamak a panag-boycott kadagiti sesyon.
Kabayatanna, iti isyu ti maipagarop a pannakasina-sina ti publiko gaputi impeachment, imbaga ti Malacañang a ti tarigagay a transparency ken accountability ket para kadagiti umili ken saan a rumbeng a mangigubway ti pannakasina-sina.
Segun kenni Castro, ti pudno a mamagsina ket iti fake news ken gandat nga ilemmeng dagiti ebidensiya.
Innayon ti Palace official, mas magun-od ti panagkaykaysa nu rumwar ti kinapudno ken agbalin a naridam iti publiko kadagiti impormasyon.
