BR LA UNION – Kinumpirma ti Palasyo ti Malakanyang a naarestaren ni sigud a Presidente Rodrigo Duterte itay bigat.
Daytoy ket kalpasan a naawat ti INTERPOL Manila itay parbangon iti opisyal a kopya ti arrest warrant manipud International Criminal Court (ICC).
Segun iti Presidential Communications Office (PCO), agarup alas 9:20 itay bigat, Marso 11, 2025, a simmangpet ditoy pagilian ni sigud a Presidente Rodrigo Duterte ken ti grupona manipud Hong Kong a naglugan ti commercial flight.
Apaman a nakasangpet, inserbi ti Prosecutor General iti ICC notification para iti arrest warrant kontra iti sigud a Presidente gaputi kaso a crime against humanity .
Sinigurado ti PCO a nasayaat ti salun-at ti sigud a Presidente ken ti grupona ken ineksamen dagiti doktor ti gobiyerno tapno masigurado a nasayaat ti kasasaadna.
Sinigurado dagiti opisyal ti PNP a nangipatungpal ti warrant a nagusarda ti body camera tapno masigurado ti transparency iti panangiserbi ti warrant of arrest.
Iti agdama, adda iti kustodiya dagiti otoridad ni Duterte.
