BR LA UNION – Saan a konsintiren ti Palasyo dagiti waragawag nga addaan kadagiti elemento a mangsugsog ti sedisyon wenno inciting to sedition.
Segun kenni Palace Press Officer Claire Castro a nupay saan a balat-sibuyas wenno arsagid ni Presidente Ferdinand Marcos Jr. ken saan a nalaka a maapektaran kadagiti pammabalaw wenno lunod ti publiko, ngem imbaga ti Malacañang nga adda pagpatinggaan ti amin.
Segun kenni Castro, nakasagana ti Palasyo a mangipila iti kaso kontra kadagiti mangsugsog iti publiko a kagura ti gobyerno ken iti Presidente.
Nupay kasta, inlawlawagna nga iti agdama ket awan ti pakakitaan a personal nga agtignay ti Presidente tapno aramiden daytoy.
Innayon ni Castro, saan a lapdan ti gobyerno ti karbengan ti publiko a mangiyebkas iti opinyonda, nangruna no taga-suporta wenno panatiko dagitoy ti maysa a lider.
Nupay kasta, impalagipna iti amin a saan a lumbes iti pagpatingaan a mabalin a mangpataud ti alarma, gaputa mabalin a maibilang daytoy nga inciting to sedition.
