LA UNION – Adda iti natalged a sitwasyon dagiti Overseas Filipinos idiay Israel iti laksid dagiti mang-mangngegan a kanalbuong iti aglawlaw a gapwanan iti rocket ken missile nga ipat-patayab dagiti kabusor ti ‘holy land’.
Daytoy ti kinuna ni Bombo International News Correspondent Marylyn Valencia kabayatan ti interview ti Bombo Radyo La Union kenkuana.
Maibasar iti istorya ni Valencia, adda iti aw-awagan da a “mammad” idiay Israel, daytoy ket maysa a safety room wenno safety place iti maysa a pagtaengan, a mabalin a pagturongan nu adda iti pangta ti rocket attack dagiti kabusor a Hamas.
Ngem sakbay kunana nga agturong iti Mammad, mangngegan nga umuna ti napigsa a sirena a senyales tapno pas-pasan ti aglemmeng.
