Inaprobaran ti Kamara iti maikatlo ken maudi a panagbasa ti House Bill No. 7239 wenno ti “Line Workers Insurance and Benefits Act” a panggepna a mangipaay ti mandatory insurance coverage kadagiti rinibu nga electrical ken telecommunications line workers iti pagilian.
Iti botos a 197-0, naaprobaran iti singasing kas panangbigbig iti napeggad a trabaho dagiti line workers a maibilang kas “vital link” iti suplay ti koriente ken komunikasion a mangpatpataray iti ekonomia.
Dagiti benepisio iti sidong ti singasing:
Compulsory Insurance: Saklawen dagiti employer ti premium para iti life, accident, ken disability insurance dagiti empleado.
Gatad ti coverage: Ti minimum nga insurance benefit ket agpannuray iti kadakkel ti kompania:
- Electric Cooperatives: manipud ₱200,000 (bassit) aginggana ₱1 million (mega large).
Private Distribution Utilities (PDUs): ₱1.5 million.
- National Transmission Corp. / Grid Operator: ₱2 million.
Kanayonan a tulong: Malaksid iti insurance, obligado dagiti employer a mangipaay ti retirement benefits, mortuary assistance, ken reimbursement ti medical expenses para kadagiti nalak-am a pannakadangran bayat nga agtartrabahoda.
Segun kenni House Majority Leader Sandro Marcos, maysa kadagiti kangrunaan nga author, rumbeng laeng nga umawat dagiti line workers iti umdas a proteksion uray no isuda ket regular, kontraktual, wenno job order gapu iti peggad a sangsanguenda iti panangtarimaan kadagiti linya ti koriente ken kable iti uneg ti daga.
Saklawen ti singasing dagiti amin a line workers kadagiti telecommunications companies, power line contractors, private utilities, ken electric cooperatives iti intero a Pilipinas.###
