LA UNION – Naisalakan ti maysa a mangngalap manipud Samar ti pada na met laeng a mangngalap manipud iti probinsya ti La Union.
Nabigbig daytoy a ni Arnel Robin Regino, 42, addaan asawa, tubo ti Barangay Losa, iti ili ti Daram idiay Samar.
Immuna ditoy, agawiden iti grupo ni Samuel Ibaya, 34, baro ken residente ti Barangay San Agustin, iti ciudad ti San Fernando, manipud iti taaw idi makitada ken tinulongan ni Regino nga agpapaarayat.
Iti pannakiuman ti Bombo Radyo La Union kenni Regino kinuna na a nagluwas isuna idiay Barangay Losa tapno agkalap ngem naibusan ti gas iti nagluganan na a motor banca agingga a maisar-ong iti kabaybayan a paset ti La Union. Kinuna na nga ammo ti pamilya na iti inaramid na a panagkalap.
Nupay kasta, pinaneknekkan ni Police C/Insp. Jonathan Cuntapay, hepe ti Daram Municipal Police Station, nga residente ti nasao a lugar ni Regino ken madama nga agnanaed idiay Marikina.
Segun oay iti opisyal, immuna nga impagarop ti pamilya a natayen ni Regiono gaputa uppat a tawenen daytoy a saan nga nagawid idiay Daram ken nagpukaw met daytoy idiay Marikna.
Kabayatan na, manamnama a sumangpet ita nga aldaw dagiti kakabsat ni Regino iti probinsya tapno sukunen ken iyawid daytoy idiay Marikina.
