LA UNION – Nadutokan kas baro a 2024 Mangingisdang Director ni Alberto Umban Jr. manipud Pangasinan, kas panangsurot iti katulagan ti tunggal rehiyon a rotation iti agtugaw a fisherfolks leader iti kada tawen.
Iti pannaki-uman ti Bombo Radyo La Union kenkuana, sakbay a nagtugaw isuna kas Mangingisdang Director, nagpapatang dagiti amin a Municipal Fisheries and Aquatic Resources Management Council iti rehion uno no sino iti maipatugaw a fisherfolks leader.
Segun kenkuana, napateg ti akem na gapu ta isuda iti agbalbalin a pannakangiwat ken mangidandanon iti parikut dagiti babassit a mangngalap iti regional agingga national, ta adun dagiti mapaspasaran a problema iti mangngalap kas kuma iti kimmapsut a production, global warming, ken iti pannaka-apektar da iti mapaspasamak ti West Philippine Sea.
Malaksid pay dayta, isuda pay iti agkamkampanya a suroten dagiti linteg ti mangngalap para iti sumarsaruno a henerasyon.
Napateg met para kaniada iti programa ti Bureau of Fisheries and Aquatic Resources ta isu iti mangmangted ti suporta kadagiti mangngalap.
Inlawlawag pay ni Umban ti nakaro nga epekto nga ububraen dagiti Chinese fishing vessel iti west philippine sea, kas kuma iti saanen a pannakastrek ti mother boat da gapu ti inubra ti china a panangisarra dagiti dadakkel a barko iti pagserrekan ti Scarborough Shoal.
Innayonna pay nga iti mapaspasamak itan ket kasla agtaktakaw dagiti manggalap iti bukod a kabaybayan a teritoryo ti pagilian gapu iti kina-agum dagiti Chinese.
Kabayatanna, nakalinyan dagiti aktibidadda kas iti panangbisitana kadagiti mangngalap iti nadumaduma nga ili tapno maamuanna no ania dagiti kasapulanda ken no ania dagiti mapaspasaranda a problema.
