Dakkel iti ambag dagiti mangmangged iti panagdur-as ti ekonomiya, isu ti panggep ti pannakaangay ti 124th Labor Day Job Fair iti Rehion Uno a mapaadu pay dagiti addaan trabaho iti lugar.
Nailawlawag a no ti tunggal maysa nga addaan kabaelan nga agtrabaho ket adda trabaho na, saan laeng a dagiti personal a kasapulan iti matugunan no di ket makatulong pay iti agtultuloy a panagdur-as ti ekonomiya iti rehion ken iti intero a pagilian.
Segun kenni Board Secretary VI Atty. Romina E. Boado-Cabrillos ti Regional Tripartite Wages and Productivity Board, dagiti programa a kas iti job fair ket dakkel ti maitulongna tapno maitedan iti oportunidad dagiti awanan trabaho ken mapapigsa ti ekonomiya saan laeng iti rehion no di ket iti entero a bansa.
Kabayatanna, inawagan na dagiti agsapsapul ti trabaho nga agtultuloy iti panagpursige ken saan a maawanan ti namnama, no saan man a maala a dagus ket agtultuloy laeng iti panag-aplikar gapu ta dagiti kabaelanda ket mabalin a mangted iti dakkel nga ambag iti panagdur-as ti ekonomiya. (Report by Bombo Jordan)
