LA UNION – Minimal laeng iti mapas-pastrekan dagiti mango growers ditoy La Union gaputa apektado iti produksiyon iti bunga ti mangga gaputi panagatake iti peste a maaw-awagan ti “kurikong” wenno Cecid Flies.
Daytoy ti kinuna ni Pedro Corpuz, barangay chairman iti Barangay Acao, Bauang, La Union ken Presidente ti Mango Growers Association ti La Union.
Kinuna na, a nupay agtaltalinaed ti nasao a problema a panagraira ti nasao a klase ti peste, tuloy latta iti panagpatanur da iti napintas a klase ti bunga ti mangga, a mailaklako iti local market ken pang-export.
Inaklon na pay nga adu a miyembro iti asosasyon da iti nakabulod ti pondo, para iti panagpabunga ti mangga, ngem gaputi napasaran a pannakalugi ket saan pay laeng dagitoy a makabayad wenno maipulang iti nabulod da a kantidad.
Nupay kasta, siniguro ni Corpuz nga agtultuloy iti panang-suporta da kadagiti mango growers tapno saan a maapektaran iti negosyo ken pagbiagan dagitoy.
