Naballigi a naisayangkat ti pannakaiwaras ti tulong pinansial babaen ti Presidential Assistance for Farmers and Fisherfolk Program (PAFFP) idi Abril 27 iti Bacnotan Farmers’ Park and Civic Center, a tinabunuan ti ginasut a benepisiario manipud iti sektor ti agrikultura ken mangngalap.
Ti nasao a programa ket indauluan ti Department of Agriculture (DA) kabinnulig ti lokal a gobierno ti Bacnotan, a panggepna ti mangipaay iti dagus a pinansial suporta kadagiti mannalon ken mangngalap a naapektaran iti nadumaduma a karit kas iti panagngato ti presio dagiti tagilako, panagbalbaliw ti klima, ken dadduma pay a parikut iti ekonomia.
Personal a timmabuno da La Union First District Representative Francisco Paolo Ortega, kadua da Bacnotan Mayor Divine Fontanilla ken Bise Mayor Francis Fontanilla iti nasao nga aktibidad. Iti mensaheda, impaganetget dagiti opisyales ti kinapateg ti agtultuloy a suporta kadagiti kangrunaan a sektor ti panagpataud iti taraon ti pagilian.
Maibasar iti report, nakaawat ti tunggal benepisiario iti pinansial a tulong a manamnama a mausar a kanayonan a panagpuonan iti panagtalon ken panagkalap, kasta met para iti inaldaw a kasapulan dagiti pamiliada. Impasigurado pay ti Department of Agriculture a paset ti nasao a programa ti nalawlawa nga addang ti gobierno tapno mapapigsa ti food security ken mapasayaat ti panagbiag kadagiti away.
Impeksa ni Mayor Divine Fontanilla ti napasnek a panagyamanna iti Department of Agriculture, opisina ni Congressman Ortega, ken iti Office of the President iti agtultuloy a suportada iti ili ti Bacnotan. Kinunana a dakkel ti maitulong dagiti kasta a programa tapno maipangato ti kasasaad ti panagbiag dagiti lokal a mannalon ken mangngalap.
Kabayatanna, impanamnama ti lokal a gobierno nga agtultuloy ti pannakikoordinarda kadagiti ahensia ti gobierno nasional tapno masigurado ti agtultuloy a pannakaipaay dagiti programa ken serbisio a makatulong kadagiti umili.
Maysa laeng ti PAFFP kadagiti gannuat ti gobierno a panggepna a tamingen dagiti madagdagus a kasapulan ti sektor ti agrikultura bayat a mapatibker ti kabaelanda nga agsubli ken agbalin nga ad-adda a makaandur iti sango dagiti karit iti masakbayan. (Report by Bombo Ericka)
Photo Courtesy: Bacnotan, La Union (FB)
